“მანჩესტერ იუნაიტედის” მთავარ მწვრთნელ სერ ალექს ფერგიუსონს “რედინგის” ქომაგებისთვის უხამსი ჟესტის ჩვენებაში ადანაშაულებენ.
ამის შესახებ, ბრიტანული გამოცემა Daily Mail-ი იტყობინება.
გამოცემის ინფორმაციით, ზემოაღნიშნული მიუღებელი ფაქტი პრემიერლიგის 23-ე ტურში “რედინგთან” მატჩის დროს მოხდა, როდესაც კრიშტიანუ რონალდუმ მეტოქის კარში მეორე გოლი გაიტანა, ხოლო ფერგიუსონმა სიხარული თავისებურად გამოხატა.
ფერგიუსონმა მომუშტული ხელები მაღლა აღმართა, მაგრამ ისე მოხდა, რომ მარცხენა ხელისგული მარჯვენა ხელის იდაყვთან აღმოჩნდა, რამაც ინგლისის ფეხბურთის ფედერაციის სადისციპლინო კომისიის მესვეურები დააინტერესა.
თავად ფერგიუსონი ირწმუნება, რომ იგი უდანაშაულოა. “მე მხოლოდ სიხარული გამოვხატე, რაც მიმდინარე სეზონში ჩვენთვის ერთ-ერთ ყველაზე რთულ მატჩში გამარჯვებამ მომიტანა” – განაცხადა “მანჩესტერ იუნაიტედის” მწვრთნელმა.
მიუხედავად ამისა, ინგლისის საფეხბურთო ასოციაციის ხელმძღვანელობამ ამ ეპიზოდის ვიდეოჩანაწერის შესწავლა დაიწყო.
ცოტა ხნის წინ, ფერგიუსონი სადისციპლინო კომისიამ 5000 ფუნტით დასაჯა, ვინაიდან მან “ბოლტონთან” შეხვედრაში არბიტრს არცთუ კორექტულად მიმართა.